2010-06-18

مــوعــــد غــــــرام ؟؟؟



شقاعد يصير بهالمجتمع ؟

رياييل طقت عقولهم وحريم افصلت افيوزاتهم ؟؟؟

طبعا الكل محد متحمل أحد والأغلبيه صارت تلف وادور وشي طبيعي جدا نشوف الخطوط اللي من غير بيانات بيد الريال والمره واللعب والنصب على مواقع الجات والينون والجمبزه في مواقع الزواج والإنحطاط والجنس المباح في المواقع الأجنبية تحت لنك ( الكويت ) والقز والمغازل في الأفنيوووو و مجمع 360 والمارينا وسوق شرق والدق والرقص في بعض الشقق والموضه اليديده إن الواحد وايد تكانه والوحده وايد تكانه فيروحون بالويك إند دبي ولا مصر ويقضون أوقات ممتعه ؟

كل ما سبق يقع تحت الحريات الشخصية بشكل بحت وكل حسب تربيته وبيئته التي ترعرع فيها والعامل الرئيسي فيما سبق يتنوع بالأسباب إما الحاجة للمال أو الحاجة إلى مقدار من الحنان والإهتمام ومن قبل هذا كله هو الفراغ القاتل والمساحة الهائلة من الفراغ لدى الجميع ؟

ولكن السؤال المهم :

ماذا قدمت وماذا فعلت حكومة رواد الفضاء اللي عندنا للمجتمع ولتنمية وتطوير الإنسان الكويتي ؟؟

قط ورا ظهرك وانسى وعيش يومك لا تنطر منهم شي

يقولي واحد من الربع هذا الموقف اللي صار معاه :

يقول خبرك انا عزوبي ومفلس ومقحط وهم أبي أعيش وأستانس فشبكت على موقع من مواقع الجات وشبكت ( برايفت ) مع وحده وبو ربع او نص ساعه انتقلنا على المسنجر لتكملة الحوار والمره تقولي إنها مطلقه وإنها أية من الجمال وإن جمالها سبب تعاستها وإن وإن وإن المهم يقول أنا انثولت وطقني ( عقر بقر ) من حجيها وشوي وأتولع فيها وعقب يومين واعدتني بأحد المطاعم وعطتني كالعاده رقم من غير بيانات وقالتلي بيوم موعدنا راح اكلمك بالتلفون وبالمطعم نشوف بعض ، يقول طبعا أنا لا تشوفني شلون كاشخ ومضبط عمري أصفط عشر معاريس ! يقول دشيت المطعم بالموعد المحدد وقلت حق المطعم أبي الطاوله خضره يعني حط كل ( المنيو ) اللي عندك يقول بتشيحط عليها يقول ولا بو ربع ساعه والا اللي داشه وحده طيحت قلبي بصروالي ؟

يقول ولا وحده وزنها فوق ال120 والحلج جنها زكريا زكريا يقول طبعا ويهي قام يعطي ألوان والعرق يتصبصب مني جنها واحد من الربع هههههههه
جان تقوله فديتك حبيبي متأكده إنك منت قادر تمسك عمرك من جمالي !!!
يقول اشوي جان أقول لها عن إذنج ثواني بروح الحمام ، يقول قمت جان أنحاش من المطعم وتعال إذا فيك خير القط رقم سيارتي من النحشه ههههههه
سألته والأكل اللي بالهبل اللي طلبته منو راح يدفع فاتورته ؟
قالي طبعا ملكة جمال الغنم اللي يايتني العن ابو الثقه اللي اهي عايشه فيها ؟


هذا موقف واحد من مئات الآلاف من المواقف المضحكة والضريفة وأحيانا تكون قاسية وأحيانا تكون محل صدمة ولكن الأهم والأكيد إن المجتمع يعاني من خلل وقصور واضح وفاضح بالشخصية الكويتية مع عدم التعميم طبعا .


حفظ الله الكويت أميرا وشعبا من كل مكروه

دمتم بود ............


وسعوا صدوركم بس