الأربعاء، 20 أكتوبر، 2010

خلج خوش مره أحسن لج ولا ؟؟؟؟؟؟


مسألة العوانس والمطلقات والأرامل أصبحت بالفعل مشكلة جدا خطيرة وكبيرة وواسعة الانتشار ، نعم المسألة هي قسمة ونصيب ولكن هناك شيء اسمه العمل بالأسباب ؟

فهناك غلاء المهور وهناك الشروط التعجيزية وهناك الأصل والفصل وهناك غلاء المعيشة ورتم الحياة السريع وهناك القضاء والقدر والذي يتوقف عنده الجميع وهناك غيرة المرأة وطباعها ومستوى ثقافتها الذي يحدد نوع ومستوى جيل أبنائها ؟

أحيانا تظن المرأة بأنها قوية بدون زوج فأقل ما يقال :
طلق وأنا العن خيرك بالمحاكم ومعاش مضمون بالشؤون !!!

في السابق لم نكن نسمع أو نقرأ شروط النساء بهذا الحجم الكبير والذي يصل أحيانا إلى المبالغة وكأنها بنت شاهبندر التجار أو بنت حاكم الديار في السند والهند ؟
اليوم الأمور جدا غريبة !!!

فهذه مطلقة ولديها أبناء وتشرط بأن تتزوج زوج جميل وغني ويتحمل مصاريف أبناء الغير وأن لا يكون مطلق ولديه أبناء !!!

يعني صدقني :)
وهذه تطلب بأن يكون بيتها فيلا وأن يكون مستواه مناسب لمستواها ؟؟؟

أقول شرايج بغرفة عزابية
وهذه تطلب زوج Free ولا يكون متشدد أو متزمت !!!
قولي أبي خروف شحقه الذرابه
وهذه تطلب زوج يكون يشبه الممثل الفلاني ؟؟؟
الطب النفسي ما خلى أحد بحاله
وهذه تطلب زوج وتهدد أبط عيونه إن شاف وحده غيري !!!

هذي مهرها لازم يكون جيتي ولا زد
وهذه تطلب زوج لا يقل عن شهادة جامعية وما فوق ؟؟؟

شكو الأخت الشؤون الإدارية
وهذه تطلب زوج بمهر ومؤخر وشقة مؤثثة بالكامل وخدامة !!!

يا حلاة العزوبية والله

صدق من قال : مكسوره وتبرد ... أنتي ستري نفسج وحمدي ربج إن في أحد طق بابكم لأنها نعمة من رب العالمين هالمره تقعدين اتعذربين بالريال واتشرطين عيل قعدي أبرك جذي واكلي بعمرج حسرة ؟

المشكلة تعال وشوف إذا قال الريال حق المره خففي مكياجج ولا غيري ملابسج لبسج مو عدل .... بس خلاص قامت قيامة هالفقير :
أنت شنو شاك فيني ولا شايف علي شي ولا ما عندي هدوم ... امش أنت بنفسك اشترلي ولا تصير نجره وتنشف ريجه لين ما يدوخ الفقير ويقولها تكفين طلعي بس كل شي فيج تمام ؟

ولا تعال وشوف بعض الحريم قبل لا تروح الدوام تقول رايحه عرس مكياج صارخ ولبس شي صح وعطر يثول المباركية ومن ترجع حق بيتها امسحت وبدلت وصارت جلحه ملحه جدام هالشهيد الفقير !!!

ولا تلاقيها تطبخ وتنجب الغدى وتقعد معاك واتغدى وبهدوم المطبخ عقبها تقط روحها على الفراش وسد أذنك من الشخير وخشمك من الريحه ؟؟؟

طبعا ما يبيلها حجي تغير ملابسها وتقطهم على الأرض وتعالي يا سوليداد ولا يا ميري ولا يا جندرا لقطي ورى معزبتج ورتبي وغسلي ملابسها وإذا في أمج خير ضيعي شي أو خربي شي خلاص شهادة الوفاة مختومه وخالصه !!!

ينادون بالمساواة وصدعت روسنا بالمساواة وإن قلت لها جان شريتي بطريجج هالشغله الفلانية اطلعت مباديء الرجولة وتلعن خير خيرك وأنت شخانتك مو أنت الريال مو أنت أبو البيت مو هذول عيالك ؟؟؟


وفي لحظات تلاقيها متزهلقة ومتعطره وصايره برنسيسة الكويت ... اهني حط ايدك على قلبك وقول وراها مصيبة ... حبيبي بعد قلبي هلي وطوايفي أنا اليوم بالصدفه طلعت من الدوام لقيت سيارتي مدعومة صلحها ؟!؟ نظرعيني فديتك جيكت على مخالفاتي لقيتهم 400 دينار سكرهم وأنا أعطيك كل شهر 15 دينار ؟!؟ دنيتي أنت كلها رفيجتي مصرية وريلها فقير افصلوه من الدوام حاج لنا واحد من ربعك الواصلين يشغلونه أي شغله ... ليش علشان تبين حق رفيجتها أنها ترى هاااا ديري بالج ترى أنا مو أي أحد ديري بالج ؟!؟ تصدق كل يوم أكتشف إني أعشقك وأموت فيك بعد قلبي بس اليوم صكت فيني الدنيا ... ليش يا الغالية ... اتصدق زين اطلعو حرامية مطرشيلي رسالة يقولولي عليج 350 دينار مكالمات وراس عيالي إني ما تحجيت هالكثر ولا عندي انترنت يا ظهري وسندي ادفعلي اياهم وأنا أوعدك إنها ما اتكرر ؟!؟ يا روح روحي أنت يا أحب واحد بدنيتي نبي نسوي قرقيعان فصولي أبي اتجمل فيك وبعيالك جدام أهلك أبي كل اللي يشوف الزين يقول إي هذي عايشه من خير ريلها ومو مخلي عليها قاصر ؟!؟

وهذي تموت تموت على الحش والقرظ بالناس وهذي ادور وين اللي تقرى فنجان قهوه وهذي نايمه نوم في مراكز التجميل وهذي مالك أمل تقعد بالبيت يا غداها في الأفنيوز وعشاها في 360 ولا معزومه بعرس ولا رفيجاتها مسوين يمعه لا والسنعه فيهم تعرف تسوي بيض وطمام والجاي تصبه لك بقلاصات الجبن ؟؟؟
وأنا أقول شفيهم الرياييل مبوزين ومفلسين ؟

بعض ما قيل في النساء :

المرأة كالقرد لا تترك غصنا حتى تمسك بالأخر ؟

شاهد فيلسوف امرأة شنقت نفسها في شجرة فقال : يا ليت كل الأشجار تحمل مثل هذه الثمار ؟

قالت إحدى الآنسات لشاب كان يطمعها بالزواج : إنني مستعدة لأن أكون لك شريكة في جميع همومك فقال لها : ولكني خلي من ذلك حيث لا هم عندي ولا ضيق فقالت له : سيكون عندك متى تزوجت يا حبيبي ؟


هذي عينة بسيطة من مصايب وبلاوي بعض الحريم اللي بالديره ويقولون ليش حريم الكويت محد يبيهم !

طبعا ما سبق هي عينات حقيقية من بعض أكرر بعض حريم مجتمعنا ولو خليت خربت وبالتأكيد يوجد الأفضل والأحسن
في حريم ما يسوون قطف زقاره تقطه بطرف صبعك وفي حريم يسوون ألف شارب وألف فحل




ترقبوا المقال القادم عن معشر الرجال بني جنسي اللي مفشلينا :)








خالص العزاء للكويت وأهلها بفقدان أحد عمالقة الفن الكويتي العملاق الفنان غانم الصالح عظم الله أجركم وأحسن الله عزاكم ولا عزاء لحكومتنا اللي ما تعرف أبد قيمة بعض أبناء الكويت الكبار، العالم والتاريخ يذكرهم وحكومتنا من زماااااااااااااان انعدم إحساسها بعيالها


حفظ الله الكويت أميرا وشعبا من كل مكروه

دمتم بود ...........



وسعوا صدوركم بس

video



video


video