قلنا يمكن موضة ؟قلنا يمكن هبه ؟
قلنا فتره وتعدي ؟
بس لا السالفة أثاريها قاعدة تصير واقع مؤكد ؟
شالسالفه ؟ أنا أعلمكم ؟
اطلعوا في طب التجميل وشركات التجميل بصرعات غريبة عجيبة مثل حواجب يرسمونها – رموش تركيب ؟
قلنا ماشي مو غلط خل المرة ترقع بعمرها حق ريلها وبنفس الوقت يتحرك سوق الحريم عندنا ؟
لا مو جذي زادت السالفة صار فيها دق إبـر وتنفخ خدود وشفايف ... لا زادت صارت تكسر خصوم وترقع فيها ... لا زادت صارت شفط دهون عقب الكروش ... لا زادت صارت نحت أرداف وأجناب ... لا زادت وزادت وزادت لين ما انثولنا ما قمنا نعرف منهي المرة الطبيعية من المرة اللي توها طالعه من الكراج ؟
انزين شلون لو في ريال أو ذكر يبي يتزوج شلون يعرف إن جان هذي أصلية ولا تقليد ؟ بتقولون شدعوه أكيد أهله خواته أو أمه راح يعرفون مو لي هالدرجه طاع هذا علباله هالسوالف أطوف بهالوقت ؟
وأنا أقول لكم إني صادفت حالات طبعا من الرياييل لا طقون رصيف بالتفكير ... ناس منهم ربكم ستر فركشو قبل الملجة ... وفي ناس عقب الملجة انحاشو بس بدون دخول ... وفي ناس عقب الملجة بأسبوع دعم الطوفه وقب ... والسبب ( غير صالح للاستهلاك الآدمي ) ؟
عنبوا داركم استخفيتوا ينيتو زرت عقولكم لهالدرجه الجكر ضارب الديره ؟
نلتفت الله يخليكم حق الخبول واللي ما يدرون شسوون بعمارهم ؟
تلاقون واحد عمره وصل ال50 والحبيب حده مو راضي يستوعب إنه وصل لعمر الوقار بس شلون ؟
يروح هالقوطي ويحلق شواربه عدل عدل لين ما يصير جنه مدرس مصري ... أملط وأنعم من الطوفه اللي توها مصبوغة ويروح السوق ويشتريله بنطلونات ( لو وست ) طاح حظك حجي ... وعقب يصبغ شعره ويزقرت + شوية جل + النظارات الطبية اللي إطارها شبابي + أي فون يعني مواكب التطور الحبيب ... وعقب يدورله واحد من ربعه المتقاعدين منو يروح ويقعد معاه بكافيه بأحد المجمعات !!!
طوف يا أخي خل الريال يعيش ... ماشي نطوف ؟
واحد تشوفونه أبد ما تشكون فيه تقولون هذا صج ريال وفحل غتره وعقال وسكبه ولا وين داش الحبيب ... داش محل التجميل ومستلزماته !!! ليش شعنده ؟ يمكن رايح يشترى شي حق مرته أو حق أهله ... كنت نفسكم أقول جذي ... ولا الحبيب يسأل الموظفة ويقولها ( أبي شنو شي يديد وصل عندكم حق نعومة البشرة ؟ إي نسيت أبي بعد حماية حق الشمس وأبي كريم حق البشرة قبل النوم ) خير يا الطيب شفيك قلبت ديايه ؟؟؟
المشكلة حقيقية والأمور كل مالها وقاعدة تنتشر وتوسع بشكل وإن كان سري بس بشكل واسع
أنا أقول حمدوا ربكم لا نقعد يوم انلاقيكم شواذي تناطط بالشوارع
مساج - سبا معقولة فيها وجهة نظر وفيها دراسات وعلم وشهادات بالإضافة إلى الاستقرار النفسي ( الوقتي ) بس مو بخبالكم وصرقعتكم ؟
لا ويعيبون على الجنوس والبويات على الأقل هذول مرضى نفسيين ولهم حالات معقده بس أنتو شينقال عنكم ؟؟؟
الله يلطف بحالنا بس
حفظ الله الكويت أميرا وشعبا من كل مكروه
دمتم بود ...........
وسعوا صدوركم بس