الخميس، 24 مارس، 2011

مطلق + خطابة + مسيار 2 ؟


بوعبدالمحسن : وعلى جم مهرهم أم أحمد ؟


الخطابة : شوف يا بوعبدالمحسن هذول بنات ناس محترمين بس الضروف حدتهم وما يبون الحرام ولا يبون واحد يتزوجهم أسبوع ولا شهر ويطلقهم ... يبون ولد ناس مثلهم ويبي يستقر ... علشان جذي أهم كانو طالبين 2000 دينار كل وحده بس أنا أقدر أقنعهم ب1500 ولا تنسى طيبتي بعد أنت كلك خير وبركة ... والشوفة عندي بيتي برميثية وقبل الشوفه تعطيني كل تفاصيل الريال وأعطيك كل تفاصيل الحريم علشان يكونون على بينة .


بوعبدالمحسن : أوكي أم أحمد أشوف الريال وأعطيج خبر ... انتهى الاتصال .


الربع : أيوااااا يا بوسعود شتبي بعد ضبطك بوعبدالمحسن .


بوسعود : شاق الكشره ويضحك ويغمزلي ... بس بوعبدالمحسن أنت بتسلفني المهر وفوقهم 5000 تجهيز الشقة عدل ؟


بوعبدالمحسن : شرايك بعد أملج بدالك ... 1500 أعتبرها بمخباتك بس بيت الزوجية عاد دبر عمرك .


أنا : صج أنكم جمبازية وحيالة ؟ الحين أنا أسألكم وأنتو تلفون ودورون وأخرتها مسيار وبس جذي يعني انتهت السالفة ؟


بوخالد : أنت بطلت هالموضوع في شي براسك ... يا أنت بتزوج يا أنت تبي موضوع تكتبه بمدونتك .


أنا : اممممممم أتزوج !!! إي ليش لأ والله فكرة بس طلبي وايد صعب ويكاد يكون نادر ؟ أما سالفة مدونتي فبشرشحكم :)


بوسعود : الحين بيقط سالفة ما يوز .


أنا : امممممم طول بالك ! شوفو طلبي وشرطي وحده جمال صح وجسم صح ودلع صح وطرمة وصمخة وضريرة .


بومشاري : هتلر يصير لك !!!


بوعبدالمحسن : مالكم شغل فيه هذا تلاقونه لاعب بيده وبريولة .


بوخالد : صج فلان ( يقصدني ) خلنا نتحجة جد ؟ ليش ما ترتبط واتزوج وتستقر مو أبرك لك من وضعك جذي ؟


أنا : محد شكالك الحال وهالباب سكرته والقلب جويته خلكم أنتو ايملطشونكم الحريم وأتحدى واحد فيكم الحين إذا وصل الديوانية بدون لا ياخذ الإذن أو يعلم اللي عنده هذا إذا بعد ما جذب عليها و قالها إنه بفراشه دايخ وبينام :)


بوخالد : ضحكة من قلب ... ورب الكعبة يبتها شدراك إني منحاش منها ولا تدري إني بالديوانية ؟ لأني لو قايلها بروح الديوانية جان قالت لي خلني أسمع وأتأكد أنك صج بالديوانية .


بومشاري : إي من ماضيك الأسود ما تنلام هالفقيره ,


بوخالد : أي فقيره واللي يعافيك بس ... هذي مسيار ومنشفتني أول بأول علبالها إني متزوج وحده ثانية مسيار ؟


أنا : شدعوه ما سويتها أنت يعني .


بوخالد : بقق عيونه جان يقول بذمتك واللي يرحم والدينك أنت شدراك ؟ هالسالفه ورب الكعبه محد يدري عنها مولية ؟؟؟


أنا : أعلمك بس بشرط العزيمة الياية عليك وشرط أبي مجبوس بط وعشى ؟


بوخالد : تم ... يالله علمني والحين ولا تلف ودور .


أنا : اممممممم متأكد تبيني أتحجه جدام الربع ؟


بوخالد : أوف أوف لهالدرجه السالفة جايده ؟


أنا : عندي عادية بس يمكن عندك جايده .... هاااا اخلص اتحجه ؟


الربع : شماته وميتين من الضحك وبومشاري طاح من القنفة من الضحك على تعابير ويه بوخالد وحجم ارتباكة .


بوخالد : الله يستر قول .


أنا : لا ماراح أقول إلا بيني وبينك لأن السالفة فيها أسماء عوايل وخصوصيات ومهما كان إحنا ربع وكل شي بس الأعراض خط أحمر عندي .


الربع : شرايك أنك بتقول ولا بنسكر باب الديوانية وبنقوم عليك ونغسل شراعك !!!


أنا : امممممم أنتو 4 لو أنطق من كل واحد وأشتكي عليه امممممم تهقون المحكمة تحكم على كل واحد فيكم 3000 دينار في 4 قواطي = 12 ألف دينار ... والله موشين !


بوعبدالمحسن : أنت مصري ولا حساوي ؟ قول واخلص وعلمنا ؟


أنا : لو تطلع قرون بروسكم ما راح أعلمكم إلا بس صاحب الشأن هو اللي يعرف بس .


بوخالد : يناديني تعال بره علمني .


أنا : أوقيق ... تزهبوا حق مجبوس البط .


بوخالد : رد الديوانية واهو يقول : بل بل بل صج حريم وصج الديره صغيرة ؟


( ملاحظة ) : حتى أنتو ما راح أعلمكم اسمحولي .



الخلاصة :

من خلال استنتاجي من واقع الحال فإن مسألة عزوف الرجل المطلق عن الزواج من أخرى ثانية أو ثالثة أو رابعة هي مسألة مـــادية بشكل أساسي ورئيسي ... وعلى فكرة عدد الذين سألتهم عن السبب الحقيقي عن عزوفهم من الزواج بأخرى كانت أغلبها تنحصر في مسألتين أساسيتين :

الأولى : المادة .

الثانية : لجوء النساء للمحاكم والمخافر بعد الطلاق .

ما أذهلني هو أن الكثير من النساء أصبحن يقدمن عروض مغرية كتحملها لكل مستلزمات الزواج بشرط الزواج الرسمي ؟ ومع ذلك يتم الرفض من قبل الطرف الثاني لأنه فقد الأمان والثقة وبالتالي لا توجد ضمانة بالاستقرار في المرة الثانية هذا ناهيك عن الضرر النفسي الذي يمكن أن يلحق الطرفين في حال الانفصال وهذا ما لا يريده المعنيين .

بصراحة الوضع الاجتماعي في الكويت أصبح مرعب ومخيف من خلال ما أشاهده وأسمعه وأقرؤه .



عسى الرحمن يحفظ كويتنا وأهلنا ويستر علينا في الدنيا وتحت الأرض ويوم العرض عليه سبحانه


دمتم بود .....



وسعوا صدوركم بس


video

video

video