الجمعة، 27 مايو، 2011

تعداد الديره ومعجزة أحمد الفهد ؟؟؟





أصدر نائب رئيس الوزراء وزير الدولة لشؤون الإسكان وزير التنمية الشيخ احمد الفهد قرارا يلزم الهيئة العامة للمعلومات المدنية وبنك التسليف والادخار والمؤسسة العامة للرعاية السكنية وغيرها من الجهات الحكومية ووفق ما تقتضيه المصلحة العامة بطلب «شهادة تسجيل في التعداد العام للسكان والمباني والمنشآت لعام 2011 لانجاز وإتمام معاملات المواطنين والمقيمين .




الحبيب الشيخ أحمد الفهد قائد وفارس خطة التنمية اللي راح يقـوع فيها بشكل شبه مؤكد يتعامل معانا وفق عقلية السبعينات ؟؟؟
بمعنى يا تسجل ولا ماكو معاملات ... بس نسى كسنجر الكويت إن في شي أسمه ربط الكتروني ومعلوماته دقيقة جدا ومؤكدة جدا جدا ؟

أقرب لكم الصورة :

اربط إدارة الوفيات والمواليد في وزارة الصحة مع هيئة المعلومات المدنية مع وزارة التخطيط مع وزارة الداخلية بشبكة وحده وتنتهي المسألة وبحث واحد أو باستفسار عن أي عائلة راح تعرف تفاصيلها منو انولد ومنو توفى وجم خادم عندهم ، فليش عوار الراس ولغة التهديد والوعيد وبالأساس تكاليف اللي يفترون على البيوت من وين ؟ هل اهي مناقصة أو موظفين حكومة أو ملقطينهم من الشارع علمونا من وين وبجم ؟؟؟


وعلى فكرة هالعملية أوفر فوق ما تتخيلون وأسرع وأسهل وأدق .

لكن السؤال المهم :

الكويتي ما منه خوف ومكانه معروف ومتى أنولد ومتى توفى ... لكن المقيمين شلون بتحصيهم يا الجهبذ ؟؟؟

اللي منحاش واللي متغيب واللي ماله سكن موثق واللي 9 بغرفة وحده واللي واللي ... شلون بطلعونهم وبتحصونهم ... وليش لغة التهديد والوعيد ما توجهت لهم ليش دايما عضلاتكم على ولد ديرتكم ؟؟؟



إحنا بعرف أنتو حكومة كويتية ولا يايبينكم من بره مأجرينكم علمونا كل شوي قرار من صماخ واحد ما يعرف كوعه من بوعه ومره قرار من واحد مزفوف من مرته ومره قرار من وزير مستانس ... ترى الواقع والمنطق يقول إن أنتو اللي تشتغلون عندنا مو الشعب يشتغل عندكم ... وإذا أنتو عقلياتكم لهذه الدرجة مصدية وواقفه هذي مو مشكلتنا هذي مشكلتكم


تدري شلون أنا ماني مسجل مو عناد فيك لالالا بس ودي رسالتي توصل إن في شي اسمه ربط اربط وزاراتك وفكونا من مزاجيتكم ودكتاتوريتكم وفشلكم لا تحملون المواطن ذنب جهلكم ولا تنسون أيام الغزو عشنا ومشينا الديره لا وزير ولا بطيخ فوق روسنا بس من شفنا وزير ووكيل اعتفست الديره وتعقدت الأمور وما خفي كان أعظم ؟


أما الأسئلة الاستفزازية والغبية في نفس الوقت :
جم خط تلفون عندك ؟ جم خط موبايل عندك وعند زوجتك ؟ تشرب ماي صحة ولا من الحنفية ؟ وين كنت بالتاريخ الفلاني ؟ جم غرفة عندكم وجم فرد ينام فيها ؟
زين سألوني بعد شنو غداك اليوم وشرايك بالمموش مع دقوس صبار !!!


هذي الأسئلة تؤكد مدى الجهل العقلية الحكومية وانتهاء صلاحيتها بشكل يجعلهم مثار سخرية العامة واللغة السائدة ستكون هي العناد نكاية بالحكومة ( الدايخه ) .

جم خط عندك = ارجع لوزارة المواصلات .
جم موبايلزوجتك عندك وعند = ارجع لفيفا وزين والوطنية .
جم خط انترنت عندك = ارجع لمزودين الخدمة من الشركات المرخصة .
تشرب ماء صحة ولا حنفية = ارجع لوكلاء ماي الصحة أو لإتحاد الجمعيات .
وين كنت بالتاريخ الفلاني = ارجع للداخلية إدارة المنافذ .
جم غرفة عندكم = ارجع لمخططات البلدية وطابقها مع تعداد أسرة المنزل .


يعني العلة بالحكومة وصاحب خطة التنمية بفشلهم بربط أجهزتهم ووزاراتهم وعدم إدراكهم لنوعية الأسئلة ...



هذا اللي يبي يسويلنا خطة التنمية محتاج تنمية وتطور لا خوش كدينا خير ... لا والمصيبة نشوف المسؤلين يتحجون بثقة مو طبيعية وكأنهم راح يخترعون لنا شي وااااااااو أقول مالت على البامية بس .




يا ناس يا عالم يا حكومة العالم تطور والعقليات تطورت وأنت لي الحين تسأل الناس وبيدك ورقة وقلم وهذا يعني كل رب أسرة راح يكون له ملف عندكم ؟


إذا شفت حكومة متطورة وعقليات تبهرني وعمل يسعدني ساعتها راح أحترمها أما حكومة وشغلها شغل السبعينات فلا تهتمون دام أنهم لي الحين على طمام المرحوم ؟





حفظ الله الكويت أميرا وشعبا من كل مكروه


دمتم بود .......




وسعوا صدوركم بس 

video

video
video