السبت، 2 يوليو، 2011

تخيلوا ما في مكياج بالعالم ؟؟؟



أستغرب وأنا أسمع أن دوام موظفة يبدأ الساعة 7.30 أو 8 صباحا فتصحوا من الساعة 5 فجرا كي تتهيأ لدوامها بوقت كافي للمكياج وألوانه واختيار ما يناسبها من الملابس وكأنها ذاهبة إلى موعد غرامي أو إلى حفلة أو ما شابه ... لدرجة أن الكثير من جياكر وسحوت الكويت أصبحت المساحيق والميكب أمر مرافق لهن كأنه أمر روحاني ... مثلا هن تحتفظن في حقائبهن وجناط أحدث الماركات العالمية (  طبعا التقليد شغل الصين  ) في داخل هالجناط لازم حمره وملمع وكحل والبعض وين ما تروح معاها جنطة المكياج ؟؟؟

ماشي بس شلون لسبب ما ولأمر ما وبعد 6 شهور تختفي كل منتجات المكياج والمساحيق بكافة أشكالها وأنواعها ... يعني بالعربي ماكو مكياج بالسوق أبدا أبدا ونهائيا نهائيا وأخر باكيت حمره أنباع ب600 دينار لأنه نادر وخلص الميكب من مده طويلة ؟؟؟

أعتقد لالا ليش أعتقد إلا قولوا متأكد إن ما راح يحصلون وايد من الحريم سرير في الطب النفسي من الوضع النفسي اللي يكشف فضايح الجكر اللي مخشوش ورى هالمكياج ... وطبعا الكوع الأملح راح يبين والركبة السوده راح تبين ولا في تتفخ خدود ولا تتفخ اللي تخبرونه واهني الرياييل الله خير حدهم شماتة وهات يا ضحك وطنازه .

في مذيعة وممثلة معروفة بدلعها فهي جميلة نوعا ما عندما تظهر على الشاشة ولكني صدمت ودخت من شفتها من غير مكياج قلت ربي لك الحمد والشكر تشبه بوسعود رفيجي ... بمعنى أن شهرة الفنانات يرجع الفضل ليس لمواهبهم بل لمكياجهم ... فلا عجب عندما نسمع أن فلانة قطت ألفين دينار على الشغله الفلانية وفلانة سوت الشغله الفلانية ب1000 وفلانة سافرت علشان ...... فمن خلال هذه المبالغ وهذا التخطيط والتنفيذ الدقيق أقدرت هذي المصرقعه من اصطياد أثول بقراطيسه ؟؟؟

يقولي واحد اللي قاعد يسوونه هذا من باب العمل بالأسباب للزواج الشرعي ؟
ماشي يا الحبيب بس ما يدخل فيه الغش مثلا إن هالويه اللي بهر ( هالمخدي ) ممكن يضربه الصرع الصبح من يشوف ويه ثاني مغاير تماما للويه الأول ؟ هذا على افتراض إن للزواج الشرعي وأنتو فاهمين !!!

خنت حيلي السمره الكويحه هذي شراح تغبر بعمرها لا كريمات ولا مكياج جنها ظل ويمشي بروحه شالدبره ؟؟؟ أعتقد إنها راح تتخذ أسلوب المديح والثناء بالقوة والإجبار ؟ شلون ؟ تحكر واحد مسوي روحه فحل وتفش كشتها وتطلع مساميرها بس الفحل راح ينقلب خثل وتنشرخ رجولته والباجي أنتو عارفينه !!!

قبل المكياج وهالمستحضرات كانت الأوروبيات يلونون شفايفهم من فاكهة الكرز والكويتيات يقعدون يمصمصون هالديرمه ليما ريجها ينشف ومن الفحم يسوون الكحل بس محد سأل شلون يسوون المكياج هالشركات ؟؟؟

لو هالمكياج راح ادش فيه أجنة بشرية ولا بقايا الأسماك الميته ولا حتى عظام أموات هم الحريم ماراح يتخلون عن المكياج مهما كان الثمن ومهما كانت المستحضرات الغير شرعية تدخل في صناعته .


الكفار اللي كل مستلزماتنا منهم ما قصرو حتى حريمنا دلعوهم وضبطوهم ودللوهم لدرجة أن الخليجيين يصرفون سنويا أكثر من 8 مليار دولار على مستحضرات التجميل فقط ؟

بس أتوقع بتكون هذي النتايج بالمجتمع :

1- تزداد معدلات الطلاق بالمحاكم وهذا أمر جدا طبيعي ؟
2- راح تصاب 60% من البنات بحالة نفسية ... يعني اللي يصير فيها انفصام بالشخصية واللي تعتكف بيتها واللي تصير عقدتها شي اسمه سوووق ؟
3-   ازدهار تجارة البراقع ... لان كل وحده تبي تغطي ويها قبل لا تروح الدوام أو الكلية عن الفضايح ؟ 
4- ترخص المهور ... لدرجة إن البنت راح تسلف الريال بس تكفه أخذني ؟
5- راح تنقلب الدنيا .... بدال ما الشباب يدورون البنات .... يصيرون البنات اهم اللي يدورون الشباب ؟
6- راح تنخفض معدل البلاغات بحالات الاختطاف ؟ 
7- تحرم أي بنت متزوجة أنها تزعل زوجها وراح تمسك بديها وريولها فيه ؟
8- واهم شي راح نتخلص من الدعايات اللي تارسة الدنيا عن المكياج اللي يتلف البشرة ويتلف مخابي الرياييل ؟




دمتم بود .....


وسعوا صدوركم بس   

video
video
video
video