2011-09-27

عباة مخصرة والكرش طايح ؟



أي إنسان طبيعي تكون لديه مشاوير هنا وهناك لإنهاء معاملاته أو قضاء مشاويره وحاجياته وأيضا من الطبيعي أنك تنظر وتشاهد وتسجل ما يدور حولك ... بالمناسبة فإن العقل منذ نهوض الإنسان من النوم إلى أن يعود إلى النوم فإن العقل يسجل أكثر من 70 ألف صورة .. سبحان الله .

المهم نرجع حق موضوعنا

غريب أمر هالحريم !!!

وحده تلبس عباة ( شي طيب ) لكن ليش العبايه مخصرة ؟؟؟ ليش شنو الهدف من هالتخصير والتضيج ؟؟؟ العباة اخترعت لستر جسم المرأة وكعادتها تكون فظفاظة فتغطي ما لا يمكن التركيز عليه مما يمنع شهوة النظر فتكون بذلك سترت ما أمكنها وحافظت على وقارها .

بس العجيب هذا التنافس على تخصير العباة بشكل قريب أن تصبح العباة ( سترج ) والغريب بالأمر كيف سمح الزوج لزوجته بأن تخرج هكذا ؟ أو كيف سمح الأخ بأن تخرج أخته بهذا التخصير ؟ يعني العباة صارت ( إغراء ) ؟؟؟

يا بنت الحلال أنتي لو لا بسه بدله أو بنطلون وفوقه قميص طويل أبرك من هالعباة الضيقه ... ومشيتج الله يعين خلق الله ويسامحج ويغفر لج ... جنج مسويه عقد مع إبليس ؟

نلتفت الصوب الثاني نشوف وحده بعمر الزهور وزنها أتوقع فوق ال90 والكارثة أنها لابسه ( جنز ) أوف أوف أوف شنو هالثقه !!! ويا ريت لابسه قميص طويل لالالا عناد عليكم القميص داخل البنطلون وأبي أحركم وأغثكم بكرشتي اللي طايحه جنها
 ( جفل عربي ) ؟


غريب أمر حريم وبنات اليوم ؟ جد جد والله لوما العيب والمستحى والحيا جان وقفت وحده وسويت معاها لقاء بس أبي أعرف هذول شنو براسهم ؟ شلون يفكرون ؟ شنو يبون ؟؟؟  


في مثل يقول :
أكل ما يعجبك والبس ما يعجب الناس



يعني يا جماعة الخير حاولوا تحترمون أنفسكم قبل لا تطلبون الغير إن يحترمكم



جادلني واحد من الربع وهو بالمناسبة رجل فاضل ومن المطاوعة والجدال كان على موضوع النقاب :

قال : النقاب من الدين وجاء بما أعانه الله عليه من أدلة .
قلت : إن كان ما تقوله صحيح فلماذا في مكة المكرمة منذ أن عرفها الإنسان إلى اليوم وإلى أن يقضي الله بأمر كان مفعولا نشاهد آلاف من النساء يوميا في بيت الله وهن ليسوا منقبات ؟
قال : هذه مشكلتنا في اختلاف المذاهب !
قلت : خلنا نتكلم بصراحة ؟
قال : تفضل .
قلت : هل تبي تقنعني إن كل المنقبات في الكويت والسعودية وفي أصقاع الأرض نقابهن نابع من قناعة وإيمان به وبوضعه وعن طيب خاطر ؟
قال : لأ طبعا ... ولكن هناك عاداتنا وتقاليدنا .
قلت : بلشنا بالجمبزه يا بوفلان ؟
قال : إي والله في الكثير من أبناء البدو يفرضون النقاب فرض وهذا من العادات والتقاليد ومن المواجيب .
قلت : أنت الظاهر يا أنك تستهبل علي أو أنك صاحب عقلية ترللي !!!
قال : أفأ !!! ليش يا بوفلان شنو شايفني ؟
قلت : يا الحبيب أي بدو أتكلم عنهم الحين ؟ الحين بذمتك في بدوي راكب مرسيدس وما يستغني عن المكيف وياكل على طاولة طعام والعصر شابك على تويتر والفيسبوك واليوتيوب وبالليل في سينما ( سنسكيب ) وبالصيف في باريس ولا أسبانيا والحين ما شاءالله ناس تعلمت وخذت أكبر وأحسن الشهادات ومنهم الأطباء والمهندسين والوزراء ... يبا كلمة بدو هذي انتهت قول قبائل ... تدري منو البدوي ؟
قال : منو ؟
قلت : البنغالي اللي بالبر اللي يرعى حلاله ... وبعدين شفايدة نقاب تلبسه جدامك وبره تقطه ؟ المسألة مسألة واقع وحقائق واقتناع .




العالم وين وصل وإحنا لي الحين عباة مخصرة ولا نقاب والعيون ملعون أبو خيرها من الكحل ولا الحجاب اللي القذلة طايحه !!!


المستوره مستوره محد يقدر يتكلم عنها لأن المره سبحان الله تعرف من اللبس أو من المكياج أو من النظرات شنو اللي يلفت الرجل وشنو اللي يغريه وعسى ذنوب الناس برقبتج ؟



دينا الحنيف أهم من العادات والتقاليد اللي أحيانا تجعل من حياة الإنسان مقبرة


نسأل الله العافية والستر في الدنيا والآخرة



دمتم بود .....


وسعوا صدوركم