الأحد، 13 نوفمبر، 2011

الرقم 11 ظهور العلماء ونهاية الكون ؟



أضحك وأنا أقرأ وأشاهد خبال هالناس في الكويت وفي العالم على تدافعهم بل وحرصهم بأن تكون لهم مناسبة في الساعة 11 من يوم 11 من شهر 11 من عام 2011 ؟؟؟

المستشفيات تزاحمت وتم تقديم تاريخ المواليد عن طريق الطلق الصناعي ... والمتزوجين حرصوا كل الحرص على أن يكون زواجهم في هذا اليوم ؟؟؟

أنا ودي أسأل :

هل ولدكم اللي حرصتم أشد الحرص على أن يولد في هذا التاريخ هل هو سيكون أحد منقذين الأرض أو أحد علماء الذره ؟ هل زواجك في هذا اليوم يعني أنك ماخذ إحدى حوريات الجنة مثلا ؟

جلست أتخيل ماذا فعل الناس في هذا التوقيت :

الساعة 11 بتاريخ  11 / 11 / 1111 ؟؟؟

هل الناس في هذا اليوم وفي هذا التاريخ استخفوا مثلكم ولا ادفنوا نفسهم في حفره ولا بفضل هؤلاء استمرت الحياة ولا شنو بالضبط ؟؟؟


حريم الكويت استخفوا ويننو رياييلهم اللي ينقص عليهم ( بعكفة ) الحواجب يعني فقيرة .... عفية فلان حبيبي خلينا نسويها وتعال شوف عاد إذا انولد بهاليوم واااااااااو أكيد بيكون مميز !!!

مميز على شنو وبشنو ؟؟؟
يا خوفي يا حظي يطلع كاتب طايح حظه بهالوزارات ... لا ورايح الدوام بتكسي بعد ؟

وأنت يا الطيب ليش يعني صممت أنك أتزوج بهالتاريخ ؟ هل مثلا اللي ماخذها راح تنجب سبايدر مان حق الكويت .... والله قاعد أتخيل الزوج الكويتي واهو يترجى الدكتور ويقوله :
واللي يرحم أمك دام الياهل كامل سحبه وتله من بطن أمه بسويلها مفاجأة وأنا أشتغل بالمكان الفلاني وأضبطك ( وحزبطك يا برنس ) !!!


أنا الحين أبصم بالألف إن مو بس عندنا حريم منتهين لالا في رياييل ( عفوا ) ذكور مو صاحيين ؟


أتذكر واحد من الربع حبيبته حبت تشوفه بره الكويت متى ؟
بيوم ولحظة تغيير عقارب الساعة إلى السنة اليديده يعني رأس السنة ... ليش ؟ علشان العالم كله يقول بهاللحظه وااااااااااااااو أهي خبله واهو مصرقع ... لا وطلع عليه منع سفر بعد !!!!


يا ناس كل الأيام أيام ربكم ركدوا خففوا وقضبوا أرضكم لا ربكم يخفس فينا ... ولا بذمتكم في وحده تشتري طقم ( كفر ) حق سريرها بالمستشفى ب 1000 دينار غير سعر الولادة غير سعر الجناح الملكي ... ليش ؟ علشان الناس إذا زارتني تقول هذي كشخه ومو أي شي ؟؟؟ لا والبعض قام يطلب خدم سمر يخدمون نظام النوبيه أو الأثيوبيين !!! ما أدري هذول من بقايا فرعون ؟

المشكلة إن ما يسوون هالسوالف إلا عيال الفقاره .... يقطعون بأعمارهم علشان كشختهم وشحاطتهم ... بعذرهم كله يصيحون ما عندنا ومن وين لنا ؟

لا ينفهم من كلامي إني بخيل لا والله اللي يعرفني راح يضحك لأني فاشل بتوفير المال لكن إن قعدت على الأرض أدقها بالخمس وإن كنت بمطعم فاخر فالشوكة والسكين يكون لهم مفعول وإذا مطعم ياباني أو صيني فالعصي مالتهم تونسني واستمتع فيها ... لكن في أمور والله لو هالمبلغ حاطه بظرف ومعطيه حق مرتك أو حاطه بحسابها أو حاطه بحساب المولود وايد أبرك شرط ما تكون متسلفه ؟



صدق من قال الجنون فنون بس يا رب لطفك فينا ربعنا زرت عقولهم من فصلاتهم

يوم 11 مر وما صار شي بس عقول العالم انكشفت وانكشفت الشخصيات المريضة والله الشافي



دمتم بود .....



وسعوا صدوركم

video
video
video
video