خرجت تسريبات من شأنها جس النبض
الشعبي من أجل رفع الدعم عن بعض السلع والمحروقات بحجة توفير وترشيد الإنفاق
الحكومي ... وهذه إسطوانة الحكومات الكويتية منذ الثمانينات ... لكن ما أدهشني هو
النائب الفاضل نبيل الفضل الذي أتفق معه في الكثير من وجهات النظر وأختلف معه في
نوعية طرحه يعني بالعربي السانه يدق حديد ؟
يقول نبيل الفضل : على من يرفض ترشيد
الدعم أن يعطينا بدائل لوقف الهدر
تصريح نشر على صحيفة الوطن
الإلكترونية
يا أخ نبيل الفضل قول حق الحكومة خل
تبطل تطشر حلال أهل الكويت يمين وشمال وبعدين تعالوا تكلموا عن ترشيد الإنفاق ... ملايين
ومليارات توهب لدول خارجية تحت مسمى دعم السياسة الخارجية وهذا حق سيادي ومنها
مليارات ( هبه ) ونفط بآلاف الأطنان ( هبه ) ... لكن أيضا هناك حقوق أهم في
السياسة الخارجية ... لمن نقرى هدر في المال العام مني ومني ووضع أسعار مبالغ فيها
في أغلب مناقصات الدولة ... مناقصات أنت يا نبيل لو اطقطق فيها على موبايلك راح
تعرف تلقائيا إنها مناقصات كارثية ؟
والأهم من هذا شلون تساوي بين مواطن
كويتي وكويتية كل واحد عنده بيت واحد أو بيتين بالكثير وتساوونه مع تاجر عنده 5 و
10 و30 عقار يحلب الكويت حلب بالماء والكهرباء ... عقلك اللي أحترمه ما فكر يطلع
قانون إن : أي مواطن لديه أكثر من عقارين ترفع عليه نسبة تحصيل الماء والكهرباء
وخدمات الهاتف وكلما زادت نسبة العقارات زادت نسبة تحصيل خدمات الدولة ... ولا
عندك اللي يملك بيت واحد 500م مثل اللي يملك عمارات ومجمعات ومولات ؟
وبعدين يا بوبراك أنتو كأعضاء مجلس
أمه ليش تاخذون سيارات وموبايلات ومصاريف وسفرات تحت حجج مضحكة ليش أنتو قبل لا
تدخلون المجلس كنتوا تمشون بسياكل ولا بقواري ؟؟؟ خففوا أنتو كنواب من مصروفاتكم
وبطلوا مشروعكم المضحك اللي ناوين اتسوونه وهو إنشاء صحيفة وقناة فضائية خاصة
بمجلس الأمة ولا ما تدري ... وعلى دربك الله لا يهينك قول حق رئيس الحكومة يرحم
والدينك اطلع من مكتبك وروح تفقد وزاراتك وهيئاتك بنفسك بدون أي تنبيه شوف بعينك
واسمع باذنك المستوى المتردي في خدمات الدولة ... ولا الحكومة لي الحين تشتري
جرايد لكل وزارات الدولة !!! عمرك سمعت عن حكومة في العالم تشتري صحف لموظفينها ...
الشق عود يا بو براك ؟
يا بو براك أنت طلبت أحد يعطيكم
بدائل لوقف الهدر ؟
وأنا أقولك كمواطن كويتي إني أقدر
أعطيك دخل غير النفط = من 16 إلى 20 مليار دينار أكرر دينار سنويا وخلال 3 سنوات
من بدأ العمل الفعلي تبتدي المليارات تخر عليكم ... واعتبره هذا تحدي لك ولرئيسك
ولرئيس الحكومة مباشرة ... وهاتوا كل مستشارينكم واللي تعتقدون أنهم يفهمون ومعاهم
وزير المالية واللي يخطر في بالكم ... وأنا شخص واحد مستعد أشرح لكم وبأدق
التفاصيل كل فكرة وأجاوب على كل سؤال في نفس اللحظة بجلسة أو جلسات لا تقل عن 12
ساعة يوميا ... وأؤكد لك إن كل أسئلتكم راح تكون لها إجابات وفورية ؟
لكن يا بوبراك قولي أنا شنو لي ؟؟؟
هل تقصد مكافئة وكاش ؟
إي نعم أقصد بل وأتعمد إني أحصل على
حقي الطبيعي والمنطقي ببيع بعض الأفكار بعقود رسمية مصدقة ... لأن مو معقول تبيني أكون مثالي وأعطيك
دخل بعشرات المليارات بالمجان عدل ولا مو عدل ؟ وفي أفكار أطمنك مجانية للكويت
وأهلها وشرط أفكار تصدمكم ... زهبوا نفسكم
وزهبوا البيزات والحجة والبينية على من ادعى ... هذا إن كنتوا جادين من الأساس ؟
كعادتك تسأل أنت منو ؟
أنا مواطن كويتي بسيط وقريب منك مو
بعيد والسؤال عني ومعرفة منو أنا بسيط وسهل مو صعب ... عيزت وأنا أشيل وأشدخ
بالمجلس والحكومة ومحد يسمع فيهم والقلوب تحترق على ديره اللي فوق صمخان ما يبون
يسمعون اللي تحت ... أنت طلبت وأنا رديت عليك مباشرة لا حضرتك ولا سيادتك ولا
أرجوك واسمحلي وهالمجاملات السخيفة ؟
تفضل هذي عينه بسيطة من فكري وشغلي كحل عيونك
الخطة التنفيذية لأي ثورة حقيقية في الكويت ؟
يا بو براك عقب ما أحلبوها تبون
اتقصقصون الكويتيين خافوا ربكم نسبح فوق خير من رب العالمين أنتو اللي وين عقولكم
ووين ضمايركم ؟
دمتم بود ...
وسعوا صدوركم