خلك خوش ريال أحسن لك ؟؟؟

ما أكثــر الذكـــور وما أقـل الرجــــال

سبحان الله في نفسيات ما تدري شلون ربك خالقهم ومسيرهم ؟ ما أدري هل أهي بيئته اللي طلعت هالنماين ولا قناعاته اللي تغير حسب المصلحة ولا النفس الأمارة بالسوء ولا شالسالفه ؟؟؟
في بعض من يطلق عليهم بالرجال أو الرياييل صج صج الله يعين حريمهم عليهم ؟

ليش ؟ شالسالفه ؟
يا أخي تناقضهم في حياتهم وشخصيتهم يصدمك :

رياييل ما يدرون عن بيوتهم ؟!؟ ورياييل ما تعرف بيوتها إلا حق الغدا والعشا ؟!؟ ورياييل بالبيت عافس ويهه ومن يطلع ويركب سيارته سبحان الله يصير شخص ثاني ؟!؟ ورياييل من يركب سيارته بطل درجه ولا من تحت الكشن يطلع موبايله الثاني الخاص حق خرابيطه ؟!؟ ورياييل ماله شغل بمسؤلية البيت جنه ضيف ؟!؟ ورياييل لو يكح لازم يقول لأمه ؟!؟ ورياييل داخل بيته أرجوك اسمحلي وشخصية ومن يطلع بره يستخف حتى السيلانية يركض وراها الله يلوع جبدك ؟!؟ وفي رياييل لا أسلوب ولا ألفاض كله دفاشه بدفاشه مع زوجته ؟!؟ وفي رياييل الديوانية عنده والربع أهم من أهله ماكو توازن مولية ؟!؟ وفي رياييل يعشق شي اسمه جذب ونصب ونفاق تلاقيه متزوج ويقول منفصل يعني على خلاف مع زوجته وواحد يقول مطلق واهو متزوج وعنده بيت وعيال ؟!؟ وريال كل هدفه بالحياة إن يضبط عدة علاقات في وقت واحد ؟!؟ وفي رياييل النظافة الله بالخير لا شور ولا تنظيف أسنان ولا تعطر أبد يدش البيت والبيت تصك فيه العطنه والريحه الخايسه لا وفوق هذا يقول حق زوجته أبي حقوقي إي أنت حتى الصخله تمرض من ريحتك ؟!؟ وفي رياييل الجات والمسنجر والتاغت وغيره أهم من مرته وعياله ؟!؟ وفي ريال سنه كاملة ما يطلع عياله أو زوجته إلا 4 أو 5 مرات يعني مضبطكم ؟!؟


شوف يا الحبيب :
دامك مو قد الزواج شحقه تلعبون بنات الناس ؟
دامكم الجذب بدمكم ليش تزعل من تسمع حجوة ( أنت مو ريال ) ؟
دامك تحب الحرية شكو اتزوج من الأساس ؟
دامك مريض نفسي وكل يوم أنت بحال ليش تصير مثل المرض المعدي ؟


هالفقيره تقعد الساعه 6 الصبح وتقعد عيالها ويلبسون وتقطهم المدارس وتروح دوامها وعقب تطلع من دوامها وتروح اتييب عيالها من المدرسة وتطبخ الغدى أو تزهب الغدى وحضرتك توصل البيت جنك شيخ الذبان وأنت اتغدى وتلف راسك وتخمد ولا تطلع بحجج معروفة وهالفقيرة عقب الغدى ادرس عيالها وتشوف شنو نواقص المدرسة جود صارت الساعة 8 تعشي عيالها وتنومهم وتزهب أغراض المدرسة وجداولهم ولا هالفقيره تعال وشوف ويها أو حالها جنها هندية مقطوطة بسفاره حالها يعور القلب اتقط روحها على الفراش جنها قتيلة ؟؟؟

أنت وين دورك يا الحبيب بهاليوم وهالأسبوع وهالشهر ؟

أغراض مدرسة ما عندي ؟ تبي أغراض من الجمعية روحي أنتي أنا مشغول ؟ في اجتماع بالمدرسة روحي أنتي ما أقدر أطلع من الدوام ؟ ودي أقعد معاك بسولف بفضفض اللي بقلبي اترد أنت ( أعرف اسطوانتج ) ؟ ولدك مريض وده الطبي يييييه وأنتي شخانتج ؟


لا ومرات تلاقون واحد يعني صاير اسكت وخر عن دربي تلاقونه قاعد بالبيت وباكيت الزقاير يمه وصحن المكسرات جباله وكوب الجاي يسرسح فيه ومرته يمه يعني جو ... ماشي ولا الطيب حاطه على قناة الكليبات اللي تخبرونها وعاد هني تطلع الدفاشه السنعه ويقول حق الشهيده اللي يمه ( ااااااه على هذي جان زين أعرفها ولا مرتي ) اللعن خير إحساسك حده داش بشبه !! يا أخي عيب ورب الكعبة عيب احترم قدر راعي حس يمك بشر مو جماد ولا عدو !! انزين شلون لو اهي قالتلك ( ااااااه لو هذا حبيبي ولا ريلي ) طبعا بتشق صدرك ويطلع عنتر بن شداد وتشغل عليها فلم الكبرياء والكرامة والرجولة ؟؟؟


وفي نوعية غريبة تلاقيه بدون مقدمات قال حق مرته أنا عقب باجر مسافر سوريا مع الربع اهني طبعا يا يكون ريال ويعترف ويقول أنا رايح اخربط أو يجذب ويقول يا رايح نشوف بضاعه ولا نسوي ضروسنا ... اعنبوا دارك سوريا شفيها غير الخرابيط والمعاملة الزفت لا وان جانك ريال تفلسف عليهم يدوسون على راسك ... ماشي عيل وافق إذا مرتك قالتلك أنا هم بسافر مع رفيجاتي ولا رحمن رحيم عليك ... شديد العقاب عليها ؟؟؟


ولا واحد يقول حق زوجته أنا بتأخر بالدوام ولا الحبيب قاعد في الأفنيوز ليش الخوف ليش الجذب ليش تعشق إذا مرتك تزيد مقاضيبها عليك ليش تحب تنهان يا أخي قول الصج ؟

ولا واحد بره الكويت عادي يخلي زوجته ادخن أو تشرب شيشه بالقهاوي واهني لألألأ ما يصير عيب ... العن خير التناقض ليش أنت بره ريال وبالديره مو ريال ؟؟؟

ولا واحد حاكر مرته لا تروحين لا تيين وإذا بتطلعين عطيني خبر ماشي حقك ... بس شلون إذا وحده لا أنت توديها ولا أنت تيبها ولا أنت تخليها تطلع ؟

يا أخي اكتب على بيتك ( سجن النساء ) !!! خلي عندك ثقة بنفسك وثق بالمره ولا حضرتك شاري عبده ؟

المشكلة في شباب ورياييل علبالهم الرجولة شوارب ؟؟؟
ترى حتى الزهيوي عنده شوارب

في شباب علبالهم الوسامه بالجل والبنطلونات اللوويست !!!
ارجع حق تاريخ وحقيقة اللوويست وأنت بتنقد على عمرك



بعض ما قيل بالرجال :

الرجل القوي : هو الذي يستطيع أن يخضع المرأة لإدارته .. دون أن يأمرها بذلك .

إن أردت أن تكون محظوظا عند النساء فمازح المرأة كالطفلة والطفلة كالمرأة .

بالعقل وبالهدوء وبالتفاهم تنحل أكبر المشاكل
بالحب الحقيقي والفعلي تنعدم الخيانة

الصج يبقى والتصنف جهالة والرجولة أفعال ونية وضمير طيب ومواقف مو غترة وعقال ولا بحجي ماخوذ خيره .

علشان جذي قلت في بداية الموضوع :

ما أكثر الذكــــور وما أقـل الرجـــــال

عاد أنت شوف عمرك أنت أي واحد منهم ريال ولا مجرد ذكر

هذه عينات حقيقة من بعض أكرر بعض رياييل الديره
في ذكور ما يسوون نعلكم الله يكرمكم وفي رياييل وألف نعم برجولتهم وشخصيتهم وثقافتهم

حفظ الله الكويت أميرا وشعبا من كل مكروه

دمتم بود ...........



وسعوا صدوركم بس