مرات أعتقد بفكر وطريقة تخطيط الحريم مع رياييلهم ؟
ليش وشلون ؟
في ريال مرته ذكيه حدها أهي تعرف له طول ما اهو بوكه فاضي يمشي على الصراط المستقيم لأنه إذا يتله جم بيزه الحبيب زر عقله واستخف وقام يسوي حركات وشقلبات وينقلب بليلة وضحاها شاذي ويرجع لعمر اللي بعده ما انفطم ؟
أهي ألف دينار مو دانه بنك الخليج أم مليون يعني ألف اطلع الصبح أرد بالليل محروقة وخالصة فليش هالملاحه على حريمكم وخابين عمركم عليهم والواحد اللهم يا كافي قام يمشي وجنه طاووس !!!
واحد بلش بفلم المذلة على مرته وكل شوي يهددها ويذلها على هالمنحة ... ما أدري أهي من اللي خلفوك !!!
واحد قاعد ينقز بهالفقيره يبي ياخذ منحتها علشان لا تفسفسها ... عطها بعد ممـيتها !!!
واحد ركب فلم هندي على مرته وده يسوي زراعة شعر يعني نيو لوك ... طاح حظك !!!
واحد أشكره جلط مرته بياخذ فلوس المنحه مع فلوس عياله وبيروح سوريا ... الله يلوع جبدك !!!
واحد قوطي استخف ويبي يشتري مره وحده iPad و iphone و laptop ... شهالياباني البدون !!!
لا وشوفوا النصب شلون ابتكروا طريقة بس المهم يطلع جم بيزه :
في ناس أدور أحد يعطيها 500 أو ألف دينار في مقابل إن يعطيه التموين المجاني الياي
يا جماعه شصاير بهالناس ليش جذي ؟؟؟ ترى المنحة الأميرية السامية هذي لها معاني كبيرة أكبر من الماديات وأكبر من توافه الأمور اللي قاعدين نسمعها من ناس مساكين فكريا معتقدين إن بالألف ممكن يغير حياته من جذورها ؟
من ناحيتي أنا عندي الألف وال100 ألف نفس الشي بس المليون له طعم مختلف يخليكم اطقون أصبع :)
أعتقد لو تصر المنحة الأميرية مليون دينار لكل مواطن بتصير مجزره وقتلى وجرحى بالديره والريال ينقلب من طاووس لي ديناصور والمره تعتـفس وتصير من أنثى لي كيلوباترا ما قبل الميلاد .
واحد أعرفه الله منعم عليه يكلمني أمس يقول :
منحة الأسرة قررنا إن نتبرع فيها ونطلع جم مسجون عليهم ديون .
وأنا أقوله الله عسى الله يجعلها في ميزان حسناتك في الدنيا والآخرة
واحد يقول بيتبرع بجزء من هالمنحة لغزة ؟
وأنا أقوله طيح الله حظك وحظ أهل غزة معاك صج منت كفو حشيمة يا الأثول
حفظ الله الكويت أميرا وشعبا من كل مكروه
دمتم بود ........
وسعوا صدوركم بس