واحــــد مو صــج ؟؟؟

بينما وأنا جالس عند أحد الأصدقاء فأخذ يتحدث عن ( ولد أخوه ) وكيف أنه غاية بالذكاء بالتحايل على ( البنات والحريم ) وأنه ذهل من طريقته وأساليبه وعمره لم يتجاوز ال23 سنة فقط فقال لي :

شوف أنا ما راح أسولفلك أنا بدق عليه وبخليه ايينا وأنت احكم ؟

فاتصل به وما هي إلى نصف ساعة حتى كان موجود بين أيدينا فصعقت مما شاهدت ورأيت ؟؟؟

هذا الرجل لديه 7 موبايلات وخلف كل موبايل ملصق مكتوب عليه اسمه المزيف وشخصيته وماذا يعمل وظروفه واسم المرأة التي يحدثها وما هو وضعها !!!

فسألته : شنو الهدف من هذه الموبايلات وشلون عندك وقت تنسق وترتب لكل وحده ؟ وشلون إذا اتصلوا عليك 4 في وقت واحد ؟؟؟

قال : أولوية الرد للأجمل ثم للمطلقة ثم للجيكرة ... وأما شلون عندي وقت فأنا مسخر نفسي لهالأمور ... وبعدين أنا أطلع ولا شي في مقابل بنات وحريم اليوم اللي عندها خطين و5 وأعرف وحده عندها 12 خط وطبعا كلهم خطوط من غير بيانات ... خلني أصدمك ؟؟؟ في وحده جدام أهلها نقاب وعباة وماكو مكياج وقال الله وقال الرسول واهي بالصج لا تشوفها شي خيال مو صج ( تم شطب الكثير من الأمور حفاظا على الذوق العام ) ؟؟؟

سألته : وهل ربعك عندهم هالسوالف ونفس طريقتك ؟

أجاب : عندي 2 من الربع انفصلوا من دواماتهم والسبب إن ما عندهم وقت يدامون من كثر البنات والحريم ... وبعدين منو من البنات والحريم الحين اللي ما عندها خطين وثلاث خطوط ؟

قلت : في وايد ما عندهم ليش اتعمم ؟

قال : ما أعمم بس بهالوقت اللي ما عندها خطين وثلاث وأربع خطوط هذول من النوادر وصدقني اللي تمشي سيدا محد يجرب صوبها .

صديقي : أنت ليش ما أتزوج وتترك عنك هالسوالف وتستقر مع بنت الحلال ؟

ولد أخوه : وليش أتزوج عمي وأنا اللي عندي مريحيني من جميع النواحي .

صديقي : بس أعراض الناس مو لعبة وترى ربك ما يطق بعصا .

ولد أخوه : أنا ما جبرت أوغررت أو اغتصبت بنات الناس إذا وحده عمرها 20 سنه عندها خبرة مره أم 40 سنه أنا شطلع يمها وإذا وحده تدفع فلوس حق الشباب وإذا وحده أدور تروح ( ........ ) وتقول إنها اطلع بالشهر فوق ال3000 دينار وإذا وحده وإذا وحده يا عمي شي يقلب مخك ويحيرك ... يا عمي أنت بزمنكم كان في حيا وعزة نفس وسنع وستر فعلشان جذي كان عندكم حب نظيف ... بس بوقتنا السنعه والنظيفة اللي بس كانت تعرف 3 أو 4 قبلي وهاااا ركز لازم لازم لازم يجذبون ولازم يلفون ويدورون .

صديقي : أنت وربعك ونماينكم مو صاحين وصايرين جنكم حيوانات بس بأشكال أدمية ... أبوك يدري عن هالسوالف ؟

ولد أخوه : عمي أنت رفيجي فعلشان جذي أعلمك وأنت ستر وغطاي ... يتحدث بابتسامه وطلع بعد رنة 5 موبايلات في وقت واحد وأمامنا !!!

صديقي : شرايك باللي شفته وسمعته ؟

أنا : ما ألومه ... من قبل الجاهلية والنساء تغرر بالرجال وياما صارت مصايب بسبة الحريم ومحد يـنن رياييلنا وعيالنا إلا هالفصع وهالمنحرفات اطلع وافتر بهالمجمعات وهالمولات وشوف شنو لابسين وشلون هالميكب وشلون اعيونهم اتلاقط على الرياييل ... وهم الأهل بهالوقت جنه عيالهم مو عيالهم ؟ ولا وحده مراهقة أقضبها موبايل وأي باد والنت 24 ساعة ؟؟؟ يا ريال عسى ربك بس يحفظ عيالنا ويستر علينا ولا يفضحنا ولا يبلينا بهالمصايب اللي قاعدين نسمعها ونشوفها ... بس 7 موبايلات وبطريقته هذي صج شي مو طبيعي .

يا جماعة الخير ديروا بالكم على عيالكم وتحديدا من عمر 18 سنه وما فوق وعسى الله يحفظ عيالكم وعيالنا من كل شر ويهدي شباب هالوقت ؟

حفظ الله الكويت أميرا وشعبا من كل مكروه

دمتم بود ........

وسعوا صدوركم

مطلق + خطابة + مسيار 2 ؟

بوعبدالمحسن : وعلى جم مهرهم أم أحمد ؟

الخطابة : شوف يا بوعبدالمحسن هذول بنات ناس محترمين بس الضروف حدتهم وما يبون الحرام ولا يبون واحد يتزوجهم أسبوع ولا شهر ويطلقهم ... يبون ولد ناس مثلهم ويبي يستقر ... علشان جذي أهم كانو طالبين 2000 دينار كل وحده بس أنا أقدر أقنعهم ب1500 ولا تنسى طيبتي بعد أنت كلك خير وبركة ... والشوفة عندي بيتي برميثية وقبل الشوفه تعطيني كل تفاصيل الريال وأعطيك كل تفاصيل الحريم علشان يكونون على بينة .

بوعبدالمحسن : أوكي أم أحمد أشوف الريال وأعطيج خبر ... انتهى الاتصال .

الربع : أيوااااا يا بوسعود شتبي بعد ضبطك بوعبدالمحسن .

بوسعود : شاق الكشره ويضحك ويغمزلي ... بس بوعبدالمحسن أنت بتسلفني المهر وفوقهم 5000 تجهيز الشقة عدل ؟

بوعبدالمحسن : شرايك بعد أملج بدالك ... 1500 أعتبرها بمخباتك بس بيت الزوجية عاد دبر عمرك .

أنا : صج أنكم جمبازية وحيالة ؟ الحين أنا أسألكم وأنتو تلفون ودورون وأخرتها مسيار وبس جذي يعني انتهت السالفة ؟

بوخالد : أنت بطلت هالموضوع في شي براسك ... يا أنت بتزوج يا أنت تبي موضوع تكتبه بمدونتك .

أنا : اممممممم أتزوج !!! إي ليش لأ والله فكرة بس طلبي وايد صعب ويكاد يكون نادر ؟ أما سالفة مدونتي فبشرشحكم :)

بوسعود : الحين بيقط سالفة ما يوز .

أنا : امممممم طول بالك ! شوفو طلبي وشرطي وحده جمال صح وجسم صح ودلع صح وطرمة وصمخة وضريرة .

بومشاري : هتلر يصير لك !!!

بوعبدالمحسن : مالكم شغل فيه هذا تلاقونه لاعب بيده وبريولة .

بوخالد : صج فلان ( يقصدني ) خلنا نتحجة جد ؟ ليش ما ترتبط واتزوج وتستقر مو أبرك لك من وضعك جذي ؟

أنا : محد شكالك الحال وهالباب سكرته والقلب جويته خلكم أنتو ايملطشونكم الحريم وأتحدى واحد فيكم الحين إذا وصل الديوانية بدون لا ياخذ الإذن أو يعلم اللي عنده هذا إذا بعد ما جذب عليها و قالها إنه بفراشه دايخ وبينام :)

بوخالد : ضحكة من قلب ... ورب الكعبة يبتها شدراك إني منحاش منها ولا تدري إني بالديوانية ؟ لأني لو قايلها بروح الديوانية جان قالت لي خلني أسمع وأتأكد أنك صج بالديوانية .

بومشاري : إي من ماضيك الأسود ما تنلام هالفقيره ,

بوخالد : أي فقيره واللي يعافيك بس ... هذي مسيار ومنشفتني أول بأول علبالها إني متزوج وحده ثانية مسيار ؟

أنا : شدعوه ما سويتها أنت يعني .

بوخالد : بقق عيونه جان يقول بذمتك واللي يرحم والدينك أنت شدراك ؟ هالسالفه ورب الكعبه محد يدري عنها مولية ؟؟؟

أنا : أعلمك بس بشرط العزيمة الياية عليك وشرط أبي مجبوس بط وعشى ؟

بوخالد : تم ... يالله علمني والحين ولا تلف ودور .

أنا : اممممممم متأكد تبيني أتحجه جدام الربع ؟

بوخالد : أوف أوف لهالدرجه السالفة جايده ؟

أنا : عندي عادية بس يمكن عندك جايده .... هاااا اخلص اتحجه ؟

الربع : شماته وميتين من الضحك وبومشاري طاح من القنفة من الضحك على تعابير ويه بوخالد وحجم ارتباكة .

بوخالد : الله يستر قول .

أنا : لا ماراح أقول إلا بيني وبينك لأن السالفة فيها أسماء عوايل وخصوصيات ومهما كان إحنا ربع وكل شي بس الأعراض خط أحمر عندي .

الربع : شرايك أنك بتقول ولا بنسكر باب الديوانية وبنقوم عليك ونغسل شراعك !!!

أنا : امممممم أنتو 4 لو أنطق من كل واحد وأشتكي عليه امممممم تهقون المحكمة تحكم على كل واحد فيكم 3000 دينار في 4 قواطي = 12 ألف دينار ... والله موشين !

بوعبدالمحسن : أنت مصري ولا حساوي ؟ قول واخلص وعلمنا ؟

أنا : لو تطلع قرون بروسكم ما راح أعلمكم إلا بس صاحب الشأن هو اللي يعرف بس .

بوخالد : يناديني تعال بره علمني .

أنا : أوقيق ... تزهبوا حق مجبوس البط .

بوخالد : رد الديوانية واهو يقول : بل بل بل صج حريم وصج الديره صغيرة ؟

( ملاحظة ) : حتى أنتو ما راح أعلمكم اسمحولي .

الخلاصة :

من خلال استنتاجي من واقع الحال فإن مسألة عزوف الرجل المطلق عن الزواج من أخرى ثانية أو ثالثة أو رابعة هي مسألة مـــادية بشكل أساسي ورئيسي ... وعلى فكرة عدد الذين سألتهم عن السبب الحقيقي عن عزوفهم من الزواج بأخرى كانت أغلبها تنحصر في مسألتين أساسيتين :

الأولى : المادة .

الثانية : لجوء النساء للمحاكم والمخافر بعد الطلاق .

ما أذهلني هو أن الكثير من النساء أصبحن يقدمن عروض مغرية كتحملها لكل مستلزمات الزواج بشرط الزواج الرسمي ؟ ومع ذلك يتم الرفض من قبل الطرف الثاني لأنه فقد الأمان والثقة وبالتالي لا توجد ضمانة بالاستقرار في المرة الثانية هذا ناهيك عن الضرر النفسي الذي يمكن أن يلحق الطرفين في حال الانفصال وهذا ما لا يريده المعنيين .

بصراحة الوضع الاجتماعي في الكويت أصبح مرعب ومخيف من خلال ما أشاهده وأسمعه وأقرؤه .

عسى الرحمن يحفظ كويتنا وأهلنا ويستر علينا في الدنيا وتحت الأرض ويوم العرض عليه سبحانه

دمتم بود .....

وسعوا صدوركم بس

مطلق + خطابة + مسيار 1 ؟

دار هذا الحوار بين مجموعة من الرجال المطلقين وطبعا عندي سؤال يحوس براسي من مده وهو : ليش الريال المطلق ما يرجع يتزوج مره ثانية ؟

كان بالديوانية : بوسعود – بومشاري – بوخالد – بوعبدالمحسن – طبعا وأنا معاهم .

الوقت : الساعة 9 مساء .

عقب العشى طبعا عيوش ومجابيس من مطعم محماس حق واحد من الربع ... وعقب العشى وهدوء عواصف المعده + كوب جاي منعنع والحبيب جان يدقهم سلف !!!

أنا : أنتو الحين كلكم مطلقين وعزابية لي متى بالله هالحالة بتمون عليها ؟

بو مشاري : أسأل نفسك أنت بالأول ؟

أنا : راح أجاوبكم بس بعرف رايكم وعقب ما أسمعكم راح أعلمكم برايي .

بوخالد : أنا عن نفسي بس ما راح أتزوج وأحط على قلبي نسره من الصبح لي الليل حنه ورنه وصراخ ولا يبين بعينها شي ... عيال عندي والحمدالله .

بو مشاري : تصدق يا فلان ( يقصدني أنا ) صارلي يمكن 8 شهور وأنا أسأل نفسي هالسؤال ليش ما أتزوج وأنا الحمدالله ( الله مرهي = رازقه ) علي ومو قاصرني شي ؟ بس والله خايف من كل قلبي إني أطيح بوحدة تمرمر حالي وتقلب حياتي هم وكدر وغثى ؟

بوسعود : أنا عن نفسي ودي أتزوج اليوم قبل باجر بس تعالوا حسبوها معاي ... مهر 4000 دينار + شقه يديده وتأثيثها ب 5000 أو 6000 دينار + لوازم الملجه وتناتيف مني ومني بتصك السالفة وتوصل لين ال15,000 ألف دينار من وين لي هالمبلغ ؟ وبعد معاشي مقصص ديون من كل صوب + نفقة العيال والنسره اللي طلقتها صارت المخافر عندها مثل الأفنيوز !!!

بوعبدالمحسن : أنا تزوجت 4 حريم وكنت عادل باختياري ثنتين أجانب وثنتين كويتيات ... الأجنبيات هات أمي هات أبوي هات أخوي أبي فلوس بيتنا محتاج ترميم وهات يا بلشه بلشت عمري فيها ... والكويتيات هات يا حش يا قرظ يا تفرفر يا مني ومني ما يعرفون يقعدون بالبيت وكلهم يشتركون بالطلبات اللي تزهق حتى إبليس ؟

أنا : يعني مو معقول ما في الزينة أو ولا وحده تذكر لها موقف أو طيب ؟

الكل : لا لا لا أكيد مو لهالدرجة وإحنا ما نعمم بدليل عندنا حريم أخوانا وعيالنا وربعنا فيهم السنعه والتكانه بس شتسوي بالحظ العوي والردي ؟

أنا : انزين أنا ما قلت علموني بمشاكلكم أنا أبي شي مقنع يقول إن في أسباب قوية تمنع الزواج وبصراحة محد أقنعني غير بوسعود لأن مو قادر ماديا والعذر معاه وبالتالي الكل متفق على إنه رغم التجارب السيئة في حريم سنعين وتكانه ؟

بو خالد : أنا متزوج مسيار .

الربع : أوف أوف !!! من متى وليش ما علمتنا وشلون ؟

أنا : أضحك ؟

الربع شفيك تضحك جذي ؟ شنو هم أنت متزوج مسيار نفس صاحبنا ؟

أنا : لا يحوشك لا يبا ... أنا قاعد أضحك من شفتكم تفزون بالريال وتقولوله متى وشلون وأنا أعرف 3 منكم متزوجين مسيار فليش هالعياره جنكم يعني أسكت .

الربع : واحد يطالع الثاني وكل واحد شاق حلجه جنهم حررو فلسطين .

بوسعود : أيا ...... من صجكم متزوجين مسيار ولا أحد يعلمني ويضبطني ؟ ليش ماني رفيجكم وصاحبكم ؟

( ملاحظة ) : بوسعود متزوج مسيار بس يستهبل عليهم .

بوعبدالمحسن : شوف بوسعود وجدام الربع أنا أعرف خطابه واهي ضبطتني مع وحده مطلقة وكل أسبوع ألتقي معاها بالشقة ومتفاهمين لا تعور راسي ولا أعور راسها .

بوسعود : يا معود على إيدك والله لأدعيلك بس جم المهر وشلون فهمني ؟

بوعبدالمحسن : المسيار عقد وملاج من أي مسيد من هالأأمة المصاروه وشهود أثنين وسلامة عمرك وكل حقوق الزوجة المادية ساقطة وفق العقد بس إذا صار واحملت المره منك يصير الحمل أو الجنين شرعي مو ولد زنا والعياذ بالله .

بوسعود : اممممممم والمهر جم يعني ؟

بوعبدالمحسن : من 500 لي 2000 كل وحده ووضعها وجمالها واتفاقك معاها ؟

بومشاري : بوعبدالمحسن دق على الخطابة جدامنا وخله ( سبيكر ) ؟

بوعبدالمحسن : يييييه حاضر ما طلبت شي .

الربع : شاقين الكشره وعدلو قعدتهم .

بوعبدالمحسن : ألووو ... هلا أم أحمد شلونج شخبارج عساج بخير ؟

الخطابة : يا هلا وغلا بوعبدالمحسن بخير الله يسلمك أنت شلونك شخبارك أمرني تدلل .

بوعبدالمحسن : عندج مسيار حق واحد من الربع ؟

الخطابة : إي عندي بدوية وحضرية وبدون وسورية وكلهم جمال .

بوسعود يأشر حق بوعبدالمحسن إنه يبي البدوية أو الحضرية بس .

بوعبدالمحسن : شنو وضع الحضرية والبدوية ؟

الخطابة : مطلقات وشارطين بس مسيار لأن مثلك عارف إن تزوجو رسمي تسقط الحضانة عنهم بس والله يا بوعبدالمحسن إنهم جمال وسنعين .

بوعبدالمحسن : وعلى جم مهرهم أم أحمد ؟

يتبع .........

وسعوا صدوركم

حلوا مجلـس وفكـونا من هالـيهــال ؟

إزاء أزمة البحرين الطائفية وانتقال شرارتها إلى الكويت ( عمدا ) من قبل سفهاء ومرتزقة بعض أعضاء مجلس الأمة وانتشار التجمعات الطائفية بشكل صرف بحجج تافهة ولا يصدقها سوى الجاهل والسفيه مدغدغين مشاعر القلوب التي لا تعرف سوى هذا المعمم الأثول أو هذا والمطوع القوطي ؟

يا جماعة الخير الكويت وطن صغير ولا يحتمل أي نزاعات سياسية فما بالكم بالعبث الطائفي والذي أحرق لبنان واليمن والعراق وصولا إلى ما حدث في البحرين ؟

إن حل مجلس الأمة أصبحت مبرراته الآن جدا ضرورية وملحة ليس بسبب الاستجوابات فهذا حق ولا أحد ينازع أي نائب عليه مهما كثرت بل أفضل من اللجوء إلى الشارع ... لكن مبررات الحل أراها من وجهة نظري المتواضعة هي من أجل إخراس الأبواق الطائفية والتي لا تعي حجم المسؤولية الوطنية تجاه الكويت ومن المؤسف أن هذه الأبواق هي أبواق ممثلين الأمة الذين يفترض أنهم أقسموا على رعاية الكويت والحفاظ عليها ؟

مشاعر الشيعة يجب أن تحترم ومشاعر السنة يجب أن تحترم وكل حر في عقيدته طالما لا يوجد أي استفزاز للأخر والكويت دولة صغيرة بين 3 دول كبار والتصريحات الطائفية يجب أن يدرك مطلقوها عواقب هذه التصريحات إن كانوا بالأساس يعون ويعرفون المصلحة الوطنية العليا لدولتهم ؟

في الكويت للأسف الشديد لا يوجد لدينا رجال دولة بالمعنى الحقيقي أو المفهوم ومن مصائب الكويت أن رجل مثل الشيخ ناصر المحمد رئيس الحكومة هو ليس أهلا لإدارة أزمات كبيرة مثل لا قدر الله أزمة طائفية أو أزمة أمنية أو أزمة دبلوماسية وبالتالي لا يمكن أن تستمر الأمور بأن تكون أي أزمة أو أي مشكلة كبيرة بسرعة تتجه الأنظار إلى سمو أميرنا الوالد ليتدخل ويحسم الأمور وكأن الكويت لا يوجد فيها رجال دولة وحكماء .... مثقلين العبئ على كاهل الأمير الوالد مما يعظم ويفاقم المشاكل بشكل مطرد .

حلوا المجلس وراح تنطم عناتر المجلس لأن نوعية هؤلاء شوارب ورجال وفحولة بالحصانة البرلمانية فقط وغالبيتهم خرجوا لتسجيل المواقف لا أكثر أمام ناخبيهم ولأنه ثبت بالأدلة وليس بالدليل الواحد أن هؤلاء لا يقيمون للمواطن ولا لوطنهم أي اعتبار فكل ما يهمهم هو مصالحهم ومكتسباتهم الشخصية لا غير .

والله شيء مضحك أن وليد الطبطبائي ومحمد هايف وعاشور وسيد القلاف ومن سار على دربهم هؤلاء يعلمونا ما هي الوطنية ونصرة الإسلام ؟

نص السنة ما يدرون عن السنة النبوية الشريفة شي ونص الشيعة ما يدرون عن آل البيت شي هذا بالإضافة إلى حجم الجهل والفكر المفلس والعقلية التافهة .

ربعنا مو كفو حشيمة ولا كفو احترام وقال يافرعون منو فرعنك قال منو منعني ؟

يعني المسألة يجب أن يتدخل بها أحد كبار أقطاب الأسرة الحاكمة ليعيد ضبط الأمور ووقف هذا الفلتـان الذي لا يراعي مصلحة الكويت وأهلها بشكل حاسم ... وإلا وجب حل المجلس وضبط الشارع ومنع أي تصريحات طائفية من أجل أمن واستقرار الكويت

شيـل عنهم الحصانة يصيرون جنك مفصخهم وفاضحهم

حفظ الله الكويت أميرا وشعبا من كل مكروه

دمتم بود ......

وسعوا صدوركم بس

حمـاقـــــة النســــــــاء ؟

المرأة كائن الغبي من يستهين به أو يستخف من شدة بأسه وإن طال الزمان بالرغم أنه كائن ضعيف البنية ويفترض أنه رقيق الإحساس والمشاعر بالعموم إلا أنه في بعض الأحيان يتحول القلب الحنون إلى كائن جسور ؟

فهناك بعض النساء التافهين اللتين لا يعنيهن شيء بالحياة سوى المظاهر ؟

وهناك بعض النساء السفهاء اللتين لا هم لهن سوى الخوض بأسرار وأعراض البشر ؟

كما هناك البعض الذين لا شغل لهن سوى التخطيط لجمع المال ومهما كان الثمن ؟

وهناك وهناك وهناك ولله في خلقه شؤون ؟

لكن من غرائب الأمور أن تعتقد إحداهن أن زوجها هو ملك لها بما تحمله هذه الكلمة من معنى ... أي لا يمكن لهذا الرجل أن يخرج أو أن يتحرك قيد أنملة دون أخذ الإذن من زوجته أو دون علمها وإلا فإن أبواب جهنم تفتح على مصراعيها ، ضاربة بعرض الحائط كل منطق وعقل ولا يهم طالما أن السيطرة نافذة على هذا الرجل ؟ بحجة أن لا تأتي غيرها وتأخذه منها أو أن تغريه أو أن هذا الرجل لا أمان له أو أو أو بالنهاية التحكم والسيطرة هو معيارها ؟

ومن الأمور المثيرة والغريبة في نفس الوقت أن تجد امرأة مطلقة والله سبحانه وتعالى كتب لها النصيب بزوج أخر ولا تتعلم وتعود لنفس أطباعها ونفس تصرفاتها دون أن تأخذ سلبيات الماضي بعين الاعتبار وكأنها لم تتعلم الدرس .

الأمر الخطير وفعلا خطير أن في الكويت وصلت أعداد المطلقات والعوانس لأكثر من 40 ألف وهذا رقم ليس بالقليل على مجتمع صغير ، بل الأعظم أن هناك ارتفاع في نسبة الطلاق للفئة العمرية النسائية من 18 سنة إلى 24 سنة حسب ما رواه لي أحد الأصدقاء العاملين في التوثيقات الشرعية وأن مدة الزواج ما بين 6 أشهر إلى سنتين على أبعد تقدير .

يروي لي أحد الأصدقاء قبل يومين أن هذا الصديق لديه مشكلة وفتور شديد في العلاقة ما بينه وبين زوجته وحدث جمود وفتور لدرجة أنهم في منزل واحد ولا يدور أي حديث بينهما ووصل الأمر حتى السلام عليكم لا ينطقها أحد منهم على الأخر ؟

ثم يكمل فيقول : قلت أتعوذ من ابليس وتذكرت الطيب والأيام الحلوة وخبرك أنا منتف وعلى قد حالي فتسلفت مبلغ وقلت لها :

راح أسافر قبلج بجم يوم إيطاليا علشان أسويلج مفاجآت هناك وراح تكون عندج تذكرة درجة أولى ومن فضلج الحين مابي أسمع منج ولا كلمة نهائيا ولا تطرين أي موضوع عن خلافاتنا وهناك إذا وصلتي بالسلامة نتكلم ونتفاهم المهم أنج نلتقي هناك وهناك يصير خير وسوي اللي تبين .

طبعا صاحبنا كان متوقع بيصير خيال بهالسفرة وإن كل الأمور بتصلح والماي ترجع لمجاريها الطبيعية وبرجع العلاقة أقوى وأوثق من قبل .

يقول : أهي ساكنه فوق وأنا ساكن تحت بالبيت جان تتصل فيني وبدت اتعاتب وما عطيتها مجال وقفلت وسكرت الموضوع ومن فضلج وفري كل الكلام اللي عندج هناك وهناك شنو يخطر ابالج سويه ولج مطلق الحرية وسكرت التلفون ونمت وثاني يوم رحت أرتب إجراءات السفر والتخطيط السريع لكل ما يفرح ويسعد هالمره ؟

يقول : ثاني يوم دقت علي تلفون ولا تفتح الموضوع بحجة ما أقدر أسافر وأنا متضايجه وهات يا حجي وهات يا بجي وهات يا اتهامات وهات وهات وهات وهات يقول وأنا ساكت أنقهر وأنا ساكت أنظلم وأنا منطم !!!

يقول : بس أهني قفلت وضيعت حلاوة السفرة وطشرت كل اللي كنت بسويه وضيعت فرصة يتها على طبق من ذهب لحل كل مشاكلنا بره الديره بهدوء وبجو رومانسي وجميل ... وأنا منبهها ومحذرها إنها لا تفتح أي موضوع ، وراحت السفرة وراحت المفاجآت وتعقدت الامور لي اليوم ؟؟؟

مهما بلغت المرأة من ثقافة ومن حكمة ومن خبرة ومن دراية بصراع الحياة إلا أنها لا يمكن أن تستمر بخط مستقيم طول العمر لا بد لها من السقطات والزلات وهذا طبعا أمر طبيعي فهي بالنهاية بشر ... ولكن غلطة المرأة مدمرة وقاتلة سواء للبيت والزوج أو للحبيب أو للأهل .

صبر المرأة على زوجها كما يشاع هو أمر حسن وجيد وجميل لكنه في نفس الوقت مقيت وسيء بمعنى أنها تتحمل المواقف وتكون مواقف جميلة وذات معاني جدا عالية وسامية وأحيانا كثيرة تتعدى طوال الشوارب ... لكنها في أقرب مشكلة يبدأ مسلسل التذكير بهذه المواقف ويشتغل ( المعاير ) وكأنها بحماقتها هذه مسحت كل أمر جميل صنعته هي لتبدأ بعدها مرحلة جديدة من تسجيل المواقف .

طبعا أنا ما طريت الرياييل لأننا في زمن :

ما أكثــر الذكــور وما أقـــل الرجـــال

هذا دياية أمه وهذا أشطر من الحريم بالحش والقرظ وهذا عبد لشهواته وهذا أم ناصر ألسان طويل والحيل قاصر .

حفظ الله الكويت أميرا وشعبا من كل مكروه

دمتم بود ......

وسعوا صدوركم بس